بەروار: 16/05/2014        : بڵاوکردنەووه

بەهجەت یەحیا: كلیپ بووەتە بازاڕێك بۆ هەڕاجكردنی هونەر

46373image1

هونەرمەند بەهجەت یەحیا پەردە رەشەكەی سەر قژی لادا و شێوە راستەقینەكەی دەرخست. دواتر قژە سپییەكەی كردە گۆرانی و كلیپێك بەناوی “دڵێكی سپی”. ئەو بەرهەمە پێشوازییەكی زۆری لێكرا لەلایەن هەودارانی ئەو هونەرمەندە سۆفیگەرە. بە بڕوای بەهجەت یەحیا نهێنی سەركەوتنی ئەو گۆرانییە “راستگۆیی” بوو، ئەو دەڵێت “دڵی خۆمم كردووەتەوە بۆ ئەوەی كۆمەڵگاكەم بتوانێت بە ئاسانی بیخوێنێتەوە”.

سەرەتای ئەم مانگە بەهجەت یەحیا دوو كۆنسێرتی خێرخوازی لەگەڵ گرووپی كامكاران لە هەولێر و سلێمانی ساز كرد. (رووداو) دوای تەواوبوونی كۆنسێرتەكەی هەولێر ئەم هەڤپەیڤینەی لەگەڵ ساز كرد.

رووداو: لە بیۆگرافیاكەتدا نووسیوتە، رۆژی لە دایكبوونمان لە مەتەڵ دەچێت، مەبەستت لەمە چییە؟

بەهجەت یەحیا: بەدرێژایی مێژووی دروستبوونی دەوڵەتی عێراق و لكاندنی باشووری كوردستان بەزۆر بەو دەوڵەتەوە. هەمیشە ئەم وڵاتە مەكینەیەك بووە بۆ هاڕین و وردوخاشكردنی مرۆڤەكانی، هەمیشە كورد باجی كوردبوونی خۆی داوە، هیچ كەسێك بەدەست خۆی نییە كە لەدایك دەبێت سەر بە چ نەتەوەیەكە، كەچی كورد لەسەر ئەوە جینۆساید كراوە، جا لەبەرئەوە هیچ كاتێك رۆژی لەدایكبوونمان بایەخێكی كەلتووری و كۆمەڵایەتی نەبووە و هیچ كاتێك نەبووەتە پرسیار، بەڵكو بەپێچەوانەوە مردن و رۆژی بەخاكسپاردن جێی باس و پرسیار بووە.

زۆر كەس پێمدەڵێن دڵێكی سپی-ت بۆ من گوتووە

پێشتر كە منداڵێك لەدایك دەبوو لە ناسنامەكەیدا دەیاننووسی 1/7 لەدایكبووە، دەیانگوت بۆ كاتی داخڵكردنی لە قوتابخانە باشە، ئەگینا درەنگ وەردەگیرێت و ساڵێكی خوێندنی دەفەوتێت، بەبێ ئەوەی رەچاوی باری دەروونی و جەستەیی منداڵەكە بكرێت ئایا ئامادەیە بۆ قوتابخانە. من خۆم تەمەنم پێنج ساڵ بووە كە دەستم كردووە بەخوێندن، منداڵ لەو تەمەنە كەمەدا حەزی لە یاریكردنە. لە هەموو دنیادا وادانراوە كە لەتەمەنی شەش ساڵییەوە منداڵ ئامادەیە بۆ قوتابخانە، لە هەندەران زۆرجار پرسیارمان لێدەكرا كە بۆچی خەڵكی وڵاتەكەتان هەموویان لە یەك رۆژ لەدایك بوون؟ نەماندەزانی چ پاساوێكیان بۆ بهێنینەوە، ئەی ئەمە مەتەڵ نییە؟ ئەوان رۆژی لەدایكبوونیان زۆر لەلا گرنگە و بووەتە كەلتوور، یادی دەكەنەوە و ئاهەنگی بۆ ساز دەكەن.

رووداو: لە گۆرانییەكانتدا هەمیشە بەدوای شتێكدا دەگەڕێی. ئەو شتە چییە؟ ئەو شتە ئەوەندە گرنگە؟

بەهجەت یەحیا: ئەو كەسەی كە بەڕۆح هونەرمەندە گەڕۆكێكە بەدوای ئیستاتیكادا. ئەركی ئەدەب و هونەر ئەوەیە بگەڕێی ئەو جوانیانە بدۆزیتەوە كە چاو نایانبینێت و تەنها دڵ دەیانبینێت، بۆ نموونە كە شاعیرێك باسی نیشتیمانەكەی دەكات دەڵێی كەس نیشتیمانی نییە ئەو نەبێت، یان كە باسی جوانی دەكات دەگەڕێت دیوە شاراوەكانی دەدۆزێتەوە، هەموو شتێك لە بووندا سیمای هەیە و ناخیشی هەیە، بۆ ئەوەی بتوانیت سیمای شتێك بخوێنیتەوە رەنگە زۆری نەوێت، بەڵام بۆ گەیشتن بەناخ و تێگەیشتن لە دنیای ناوەوەی شتەكان دنیایەك گەڕان و تەمەنێك كۆششی دەوێت، كاری هونەرمەند ئەوەیە بە زمانی خۆشەویستی ناخی مرۆڤەكان بدوێنێت.

تەكنەلۆژیا هونەری كوشت

رووداو: لە گۆرانییەكانتدا وشەی مەست زۆر بەكاردێنی، ئەوە كام مەستییە؟

بەهجەت یەحیا: لە دنیای عیرفان و لە هۆنراوەی تەسەوفدا وشەی مەست یەكێكە لە رەمزە بەهێزەكان و زۆر مانا دەبەخشێ، ئەو مەستییە مەستبوونی رۆحە بە ئەوین، جیاوازە لە مەستیی شەراب و مەی، یان وشەی ساقی بەمانای فریادڕەس دێت، هەندێكجاریش مەستی بەمانای ئاگایی دێت، ئاگاییەك لێوانلێو لە هەست و ئەوین.

رووداو: كلیپ ئامرازێكی گرنگە بۆ هونەرمەند، دەتوانیت پەیامی گۆرانیەكانت تەنیا لە رێی كلیپەوە بگەیەنیت؟

بەهجەت یەحیا: رێگا زۆرە بۆ ئەوەی پەیامی خۆمان بە خەڵكی بگەیەنین، كلیپیش یەكێكە لەو رێگایانە. ئەگەر كلیپ بتوانێت گوزارشت لە ناخی بەرهەمەكە بكات و ئەو وێنانەی كە تێیدا نمایش دەكرێت هەمان ئەو وێنانە بێت كە گۆرانییەكە لە هەناوی خۆیدا هەڵیگرتووە، ئەوە كارێكی باش و سەركەوتووە. گۆرانی وەك كتێب وایە، خاوەنی فكر و پەیامە، دەشێ لە رێگای كلیپێكی هەڵەوە پەیامی گۆرانییەكە بە هەڵە بگاتە بینەر، لە لای من جوانترین كلیپ ئەو كلیپەیە كە دەست و پەنجە و روخساری موزیكژەنەكان نیشان بدات، بەداخێكی زۆرەوە ئێستا كلیپ بووەتە بازاڕێك بۆ هەڕاجكردنی هونەر.

رووداو: چوونت بۆ دەرەوەی وڵات هیچ ژیانتی نەگۆڕی و دووری نەخستیتەوە لە گوێگرانت؟

بەهجەت یەحیا: مرۆڤ ئەگەر بتوانێت خۆی پەروەردە بكات، ئیدی هیچ شتێك نایگۆڕێت. ئەگەر تەماشای مێژوو بكەیت دەبینیت كەسانێك هەبوون ئاوارەیی و ئازار و گرتن و بەندیخانە و راونان گەورەی كردوون. گرینگ نییە مرۆڤ لە كوێ دەژی، گرینگ ئەوەیە مرۆڤ چۆن بیردەكاتەوە. وتەیەكی ئەڵمانی هەیە دەڵێت (ئەوەی لە غوربەت نەژیابێت نیشتیمان ناناسێت). بەبڕوای من نیشتیمان هەتا لێی دووربیت زیاتر لێی نزیك دەبیتەوە.

رووداو: بەهۆی سیاسەتەوە خەڵك هونەری لەبیر ماوە؟

نهێنی سەركەوتنی دڵێكی سپی تەنیا راستگۆیی بوو

بەهجەت یەحیا: هونەر وەك هەناسە، نان و ئازادی وایە، كەس نییە پێویستی پێی نەبێ، بەڵێ لە هەموو كات و سەردەمێكدا خەڵك هونەری خۆشدەوێت، ئێستا لەم وڵاتەی ئێمەدا هونەر تەنیا شتە كە بتوانێت هەر هەموومان بە جیاوازیی دەنگ و رەنگمانەوە لە هۆڵێكدا كۆبكاتەوە و وامان لێبكات هەموومان پێكەوە گوێ بگرین، هەموومان پێكەوە هەست بەسۆز و خۆشەویستی و بە مرۆڤبوونی خۆمان بكەین. من بە چاوی خۆم ئەوەم بینی لەو دوو كۆنسێرتە خێرخوازییەی كە لەگەڵ كامكاران لە هەولێر و لە سلێمانی پێشكەشمان كرد.

رووداو: پێتوایە دوو جۆر هونەری گۆرانی هەیە؟

بەهجەت یەحیا: نەك هەر لێرە، بەڵكو لە هەموو جیهاندا هونەرێك هەیە دەبێت بەمێژوو، دەبێت بەناسنامە بۆ نەتەوەكان. جۆرێكی دیكەش هەیە لە هونەر كاتییە و بۆ كات بردنەسەرە، هەڵبەتە كۆمەڵگا هەردوو جۆرەكەی قبوڵە، بەڵام هەریەكەیان جێگاو سەنگی خۆی هەیە.

رووداو: گوێگرانت زۆر متمانەیان پێتە، هۆی ئەوە بەلای تۆوە چییە؟

بەهجەت یەحیا: ئەوە بەرپرسیارێتییەكی گەورەیە و هیوادارم هەتا ئەو كاتەی كە لە ژیانمدا كاری هونەریم پێدەكرێت ئەو متمانەیە رابگرم، بێگومان جێی متمانە بوون كاری بەردەوام و هەوڵ و هیلاكبوونی دەوێت. ئێمە هەوڵ دەدەین تۆوی خۆشەویستی لە كۆمەڵگاكەماندا بچێنین و هەر چاوەڕێی خۆشەویستیشیان لێدەكەین، گۆرانی بۆ هەموو گەلی كورد و هەر چوار پارچەی كوردستان دەڵێین. پەیامی ئێمە ئەوین و خۆشەویستی و رێزگرتنە لە مرۆڤ.

رووداو: دوو كۆنسێرتت لەگەڵ كامكاران ساز كرد، دەنگ و ستایلی تۆ تا چەند لەگەڵ گرووپی كامكاران دەگونجێ؟

بەهجەت یەحیا: من بە دوو ستایلی جیاواز كارم كردووە، ئەو گۆرانیانەی كە بە شێوازی سوننەتی بە ئامێرە میللییەكان كردوومە زۆر دەگونجێت لەگەڵ موزیكی گرووپی كامكاران.

گۆرانی وەك كتێب وایە خاوەنی فكر و پەیامە

رووداو: گۆرانیی دڵێكی سپی پێشوازییەكی زۆری لێكرا، نهێنیی سەركەوتنی ئەو بەرهەمە چی بوو؟

بەهجەت یەحیا: تەنیا راستگۆییە، من هیچی دیكەم نەگوتوە بێجگە لەوەی كە تەنیا باسی حەقیقەتی خۆم كردووە وەك ئەوەی كە هەم. دڵی خۆمم كردووەتەوە بۆ ئەوەی كۆمەڵگاكەم بتوانێت بە ئاسانی بیخوێنێتەوە. بەزمانێكی رەوان پێشوازیم لە هاتنی قۆناغێكی تەمەن كردووە كە خەڵكی خۆیانی تێدا دەبیننەوە، چونكە ئەوە رێگایەكە كەس نییە لێی دەربازبێت، زۆر كەسم تووش دێت دەڵێت وادەزانم ئەو گۆرانییەت بۆ من گوتووە، راست دەكات بۆ ئەوم گوتووە، خۆ ئەگەر بۆ خۆمم بگوتایە هەر لە خەڵوەتەكەی خۆمدا بۆ خۆمم دەگوتەوە.

رووداو: تۆ كاریگەریی تەكنەلۆژیا لەسەر هونەر چۆن دەبینی؟

بەهجەت یەحیا: تەكنەلۆژیا چەندە خزمەت و ئاسانكاریی كردووە، ئەوەندەش زیانی بە هونەر گەیاندووە. تەكنەلۆژیا هونەری كوشت، رۆحی لە بەرهەمەكاندا پەراوێزخست، مرۆڤی تەنیا كرد.

موزیك كارێكی هەرەوەزییە و پڕە لە خۆشەویستی و پێكەوە ژیان، بەڵام ئەو ئاسانكاریەی تەكنەلۆژیا هێنایە ئاراوە ئەو پێكەوەژیانەی نەهێشت، بێجگە لەوە بەرهەمە هونەرییەكانیش بەتاڵان دەچن. -